SURAGAON KATAL KHANA : फडणवीसांच्या नागपूरात कत्तलखान्याचा विरोधात हजारो लोक रस्त्यावर
नागपूर, जितेंद्र खापरे : उमरेड तालुक्यातील सुरगाव ग्रामपंचायत क्षेत्रातील सर्व्हे क्रमांक १९३ येथे एमएमआरडीएने १ हेक्टर जमिनीवर कत्तलखाना विकसित करण्यास सुरुवात केली आहे. या निर्णयामुळे स्थानिक नागरिक संतप्त झाले आहे. विविध हिंदू संघटना, राजकीय पक्ष आणि ग्रामपंचायतींच्या शिष्टमंडळांनी सोमवारी मोठ्या प्रमाणात ग्रामस्थांनी पाचगाव येथे महामार्गावर भजन-कीर्तन करत जोरदार आंदोलन केले. यावेळी हजारो नागरिक आंदोलनात सहभागी झाले होते. या आंदोलनामुळे या मार्गावरील वाहतूक काही काळ विस्कळीत झाली होती.
या कत्तलखान्यामुळे आजूबाजूची शेती उद्ध्वस्त होइल आणि परिसरात दुर्गंधी पसरेल. तसेच शेतकरी आणि पर्यावरणाचे नुकसान होईल. हे प्रकल्प जबरदस्ती या भागातील शेतकऱ्यांवर लादले जात आहे. सुरगाव, खापरी राजा, आनंदवन, चनोदा, नवेगाव, कळमना, दिपाळा, लांजाळा, उंडरी, डोंगरगाव, पाचगाव, चांपा, हळदगाव, मांगली, उटी, मतकाझरी, पेंढरी, सुकळी, सालाईमेंढा, वडद, वडेगाव तसेच इतर भागात धार्मिक व शैक्षणिक परिसर आहे. त्यामुळे सुरगाव ग्रामपंचायत खसरा क्रमांक १९३ क्षेत्रातील १६.२८ हेक्टरमधील १ हेक्टरमधील निवडलेला कत्तलखाना तातडीने रद्द करण्यात यावा, अशी मागणी एमएमआरडीएकडे आंदोलकांनी केली आहे, आणि त्याची कायमस्वरूपी चौकशी करण्यात यावी,अशी मागणी करत स्थानिक ग्रामपंचायत सरपंचांसह तालुका विश्व हिंदू परिषदेच्या शिष्टमंडळासह विविध हिंदू संघटना आणि राजकीय क्षेत्रातील नेत्यांना निवेदन सुद्धा देण्यात आले आहे.
सुरगाव परिसरात कत्तलखाना सुरू झाल्यास संबंधित १५ गावांतील शेतकरी, शाळकरी मुले व ग्रामस्थांना कत्तलखान्यातून निघणारी धूळ व दूषित पाण्याच्या दुर्गंधीमुळे त्रासाला सामोरे जावे लागणार आहे. सुरगाव कत्तलखान्याला सर्व हिंदू संघटना व स्थानिक ग्रामपंचायतीच्या ग्रामस्थांनी तीव्र विरोध केला असून, सुरगाव येथील कत्तलखाना त्वरित बंद करण्याची मागणी संपूर्ण तालुका व जिल्हास्तरावर होत आहे. तसेच सर्व स्थानिक ग्रामस्थांच्या प्रचंड रोषाला सामोरे जावे लागेल, असा इशारा चंपा ग्रामपंचायतीच्या माजी सरपंचांनी दिला आहे.
पंधरा गावातील ग्रामस्थांच्या उग्र आंदोलनानंतर संबंधित विभागाचे अधिकारीही आंदोलनस्थळी पोहोचले.आणि आंदोलकांशी बोलून त्यांची समजूत काढण्याचा प्रयत्न केला. त्यानंतर लेखी आश्वासनही देण्यात आले, त्यानंतर आंदोलन स्थगित करण्यात आले आहे.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-07-01T16:30:21Z dg43tfdfdgfd
