MHADA LOTTERY: मुंबईत घर खरेदीचं स्वप्न पूर्ण होणार; म्हाडाच्या लॉटरीचा मुहूर्त ठरला, वाचा कधी सोडत निघणार

Mumbai MHADA Lottery 2024: मुंबईसारख्या महानगरात आपल्या हक्काचं घर असावं असं प्रत्येकाला वाटत असतं. त्यासाठी म्हाडाकडून मुंबईत परवडणाऱ्या दरात हक्काची घरे उपलब्ध करवून दिली जात आहेत. म्हाडाच्या घरांची लॉटरी कधी निघणार याची नागरिक वाट पाहत असतात. तुम्ही सुद्धा म्हाडाच्या घरांच्या लॉटरीची वाट पाहत असाल तर तुमच्यासाठी आनंदाची बातमी आहे. कारण, म्हाडाच्या मुंबईतील घरांच्या लॉटरीचा मुहूर्त ठरला आहे.

मिळालेल्या माहितीनुसार, जुलै महिन्यात मुंबईतील म्हाडाच्या घरांसाठी लॉटरीची जाहिरात काढण्यात येणार आहे. तर ऑगस्ट महिन्यात या लॉटरीची सोडत काढण्यात येणार आहे. या लॉटरीत मुंबईतील जवळपास 1900 घरांचा समावेश असणार आहे. या लॉटरीची सोडत काढण्याची तयारी म्हाडाच्या मुंबई मंडळाकडून सुरू करण्यात आली आहे.

लोकसभा निवडणुकीनंतर राज्यातील विधान परिषद निवडणुकीची आचारसंहिता संपली आहे. त्यामुळे आता म्हाडाकडून मुंबईतील घरांसाठी लॉटरी काढण्याचा मार्ग मोकळा झाला आहे. राज्यातील विधानसभा निवडणूक ही सप्टेंबरमध्ये जाहीर होण्याची शक्यता आहे. त्यामुळे या निवडणुकीपूर्वी म्हाडाच्या घरांची लॉटरी काढून सोडत प्रक्रिया पूर्ण करण्याची तयारी म्हाडाकडून करण्यात आली आहे.

मीडिया रिपोर्ट्सनुसार, जुलै महिन्यात म्हाडाच्या मुंबईतील 1900 घरांसाठी लॉटरीची जाहिरात काढण्यात येईल आणि त्यानंतर ऑगस्ट महिन्यात सोडत निघण्याची शक्यता आहे. म्हाडाकडून मुंबईतील पश्चिम उपनगरातील गोरेगाव येथे जवळपास 332 आलिशान घरांचाही समावेश असणार आहे. ही घरे 800 आणि 1000 स्क्वेअर फूटांची असणार आहेत. या घरांचा येत्या लॉटरीत समावेश असणार आहे. यासोबतच पहाडी गोरेगाव आणि विक्रोळी येथील घरांचाही समावेश असणार आहे.

म्हाडा 'पहाडी गोरेगाव' येथे वार्षिक कौटुंबिक उत्पन्न रु. 12,00,000/- पर्यंत असलेल्या मध्यम उत्पन्न गटासाठी, आलिशान सुविधांनी सुसज्जित 2 बीएचके सदनिकांचा शानदार गृहप्रकल्प उभारत आहे.

म्हाडाने वर्गीकृत केलेल्या उत्पन्न गटांमधील कोणत्याही एका गटाचे पात्रता निकष पूर्ण केल्यास, तुमचे देखील हक्काच्या घराचे स्वप्न पूर्ण होऊ शकते. तेव्हा, म्हाडाच्या घरासाठी अर्ज करा आणि आपल्या हक्काचं, स्वप्नातील घर खरेदी करा.

म्हाडाच्या घरासाठी नोंदणी करण्याकरिता सादर आहे पारदर्शक, सोपी, सुलभ आणि सुरक्षित सोडत प्रक्रिया! आपल्या मोबाईलमध्ये MHADA HOUSING LOTTERY SYSTEM ॲप डाऊनलोड करा आणि केव्हाही कुठूनही म्हाडाच्या सोडतीमध्ये सहभाग घ्या.

2024-06-29T05:08:10Z dg43tfdfdgfd