तुम्ही गुरुजी का? झगडे गुरुजी ना? शरद पवारांनी सभेतच जुनं खोड ओळखलं

दीपक पडकर, बारामती : ज्येष्ठ नेते शरद पवार आणि त्यांची तल्लख स्मरणशक्ती आणि कार्यकर्त्यांना स्मरणात ठेवण्याची त्यांची बुद्धिमत्ता याचे अनेक वेळा अनेक दाखले मिळाले. अगदी यवतच्या सभेत 'तू भिवा शेलार का रे? असं म्हणून वर्गमित्र भिवा शेलार यांना ओळखणारे शरद पवार असतील किंवा जुन्नरच्या सभेत दूरवरून घोषणा देणाऱ्या शेतकऱ्याला ओळखून कोंडाजी वाघ का? असे विचारणारे शरद पवार अनेकांनी पाहिले.

आज बारामतीच्या कन्हेरीत सुप्रिया सुळे यांच्या प्रचाराचा नारळ फोडताना अचानक समोर पांडुरंग झगडे दिसले आणि शरद पवारांनी त्यांना प्रश्न विचारला तुम्ही झगडे गुरुजी ना? आणि सभेत टाळ्यांचा एकच कडकडाट झाला. शरद पवार कन्हेरीच्या मारुतीच्या मंदिराची आठवण सांगत होते. ही आठवण सांगताना त्यांनी सणसरपासून काटेवाडीपर्यंतची बरीचशी माहिती दिली.

अचानक त्यांना समोर ९४ वर्षांचे पांडुरंग झगडे बसलेले दिसले. शरद पवारांनी त्यांना विचारले, तुम्ही झगडे ना? तुम्ही झगडे गुरुजी ना? आणि गुरुजी उठले आणि त्यांनी सांगितलं की, हो मीच! त्यावर शरद पवारांचा त्यांच्याशी संवाद सुरू झाला.

शरद पवारांनी गुरूजींना ओळखलं, सभेत टाळ्यांचा एकच कडकडाट

पवार म्हणाले, बरे आहात का? त्यांनी सांगितलं.. एकदम ठणठणीत आहे! मग त्यांनी हात हलवून दाखवले. त्यावर शरद पवारांनी प्रश्न विचारला, आता वय किती? त्यांनी ९४ वर्षे सांगताच माझ्यापेक्षा दहा वर्षांनी वडील...? भारीच आहे राव... असा प्रतिप्रश्न शरद पवारांनी विचारला आणि अख्ख्या सभेने पुन्हा एकदा टाळ्यांचा कडकडाट केला.

शरद पवार यांच्याकडून प्रचाराची सुरूवात

बारामती तालुक्यातील कन्हेरी येथे आज प्रचाराचा शुभारंभ करण्यात आला. येथील मारुती मंदिरात ज्येष्ठ नेते शरद पवार, खासदार सुप्रिया सुळे यांच्या हस्ते नारळ वाढविण्यात आला. यावेळी आमदार रोहित पवार यांच्यासह संपूर्ण पवार कुटुंबीय यावेळी उपस्थित होते.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-19T12:04:15Z dg43tfdfdgfd