ZIKA VIRUS ADVISORY: झिका व्हायरसचा धोका वाढतोय? आरोग्य मंत्रालयाकडून राज्यांना ॲडव्हायझरी जारी

Union Health Ministry Issues Advisory About Zika virus: महाराष्ट्रात झिका व्हायरसचे अनेक रुग्ण आढळल्यानंतर केंद्र सरकार सतर्क झाले आहे. झिका व्हायरसबाबत केंद्रीय आरोग्य मंत्रालयाने सर्व राज्यांना अॅडव्हायजरी जारी केली आहे. या अॅडव्हायजरीत सर्व राज्यांना गर्भवती महिलांमध्ये झिका विषाणूच्या संसर्गाचा धोका लक्षात घेता निरिक्षण ठेवणे आणि स्क्रीनिंग वाढविण्याचे निर्देश देण्यात आले आहेत.

महाराष्ट्रातील झिका विषाणूची काही नोंदवलेली प्रकरणे पाहता आरोग्य आणि कुटुंब कल्याण मंत्रालयाचे आरोग्य सेवा (DGHS) महासंचालक डॉ. अतुल गोयल यांनी राज्यांना देशातील झिकाच्या व्हायरसची स्थितीबाबत सतत दक्ष राहण्याची गरज अधोरेखित करणारी अॅडव्हायजरी जारी केली आहे. झिका हा बाधित गर्भवती महिलेच्या गर्भातील मायक्रोसेफली आणि न्यूरोलॉजिकल परिणामांशी संबंधित असल्याने राज्यांनी डॉक्टरांना बारीक निरीक्षण ठेवण्यासाठी सतर्क करावे अशा सूचना देण्यात आल्या आहेत.

नोडल अधिकारी नेमन्याच्या सूचना

केंद्र सरकारकडून राज्यांना आवाहन करण्यात आले आहे की, प्रभावित भागातील आरोग्य सुविधा किंवा जे प्रभावित भागातील प्रकरणे हाताळत आहेत त्यांना गर्भवती महिलांची तपासणी करण्याचे, झिका पॉझिटिव्ह आलेल्या गर्भवती मातांच्या गर्भाच्या वाढीवर लक्ष ठेवण्याचे आणि केंद्र सरकारच्या मार्गदर्शक तत्वांचे पालन करण्याचे निर्देश देण्यात यावे. तसेच आरोग्य सुविधा/रुग्णालये परिसर एडिस डासमुक्त ठेवण्यासाठी निरीक्षण करण्यासाठी आणि कारवाई करण्यासाठी नोडल अधिकारी नेमण्याच्या सूचना देखील करण्यात आली आहे.

राज्यांना जनजागृती करण्याचे आवाहन

राज्यातील निवासी क्षेत्रे, कामाची ठिकाणे, शाळा, बांधकाम स्थळे, संस्था आणि आरोग्य सुविधांमध्ये कीटकशास्त्रीय देखरेख वाढवण्यावर आणि निवासी भागात वेक्टर नियंत्रण हालचाली तीव्र करण्याच्या महत्त्वावर राज्यांनी भर द्यावा असेही केंद्राने म्हटले आहे. तसेच समाजातील भीती कमी करण्यासाठी सोशल मीडिया आणि इतर प्लॅटफॉर्मवर सावधगिरीच्या संदेशांच्या माध्यमातून नागरिकांमध्ये जनजागृती करण्याचे आवाहनही करण्यात आले आहे. कारण झिका हा इतर कोणत्याही विषाणूजन्य संसर्गासारखाच आहे आणि त्यात बहुतेक प्रकरणे ही लक्षणे नसलेली आणि सौम्य असतात. हा विषाणू मायक्रोसेफलीशी संबंधित असल्याचे नोंदवले गेले असले तरी 2016 पासून देशात कोणत्याही झिका संबंधित मायक्रोसेफलीचा अहवाल आलेला नाही.

सर्व स्तरांवर राज्यांना सतर्क राहण्याचे निर्देश

याशिवाय केंद्र सरकारने राज्यांना झिका विषाणूशी संबंधीत कोणत्याही येऊ घातलेल्या चढउतार किंवा उद्रेकाचा वेळेवर शोध घेण्यासाठी आणि नियंत्रण मिळवण्यासाठी अधिकाऱ्यांना तयार राहण्याचा आणि सर्व स्तरांवर योग्य रसद उपलब्ध असल्याची खात्री करण्याचे निर्देश दिले आहेत. कोणत्याही आढळलेल्या प्रकरणाची त्वरित इंडिग्रेटेड डिजीज सर्व्हिलन्स प्रोग्राम (IDSP) आणि नॅशनल सेंटर फॉर वेक्टर बोर्न डिसीजेस कंट्रोलकडे (NCVBDC) तक्रार करण्याचे आवाहनही राज्यांना करण्यात आले.

आरोग्य मंत्रालयाचे परिस्थितीवर बारकाईने लक्ष

झिका चाचणीची सुविधा नॅशनल इन्स्टिट्यूट ऑफ व्हायरोलॉजी (NIV) पुणे, राष्ट्रीय रोग नियंत्रण केंद्र (NCDC) दिल्ली आणि इंडियन काऊन्सिल ऑफ मेडिकल रिसर्चच्या (ICMR) काही निवडक विषाणू संशोधन आणि निदान प्रयोगशाळा येथे उपलब्ध आहे. तसेच उच्च स्तरावर आढावा घेतला जात आहे. केंद्रीय आरोग्य मंत्रालय परिस्थितीवर बारकाईने लक्ष ठेवून आहे.

किती घातक आहे झिका विषाणू?

झिका हा डेंग्यू आणि चिकुनगुनिया सारखा एडिस डासांमुळे पसरणारा विषाणूजन्य आजार आहे. हा एक घातक नसलेला आजार आहे. परंतु झिका बाधित गर्भवती महिलांमध्ये जन्मलेल्या बाळांच्या मायक्रोसेफलीशी (डोक्याचा आकार कमी) संबंधित आहे आणि ही एक प्रमुख चिंता आहे. भारतामध्ये 2016 मध्ये गुजरात राज्यातून प्रथम झिका प्रकरणाची नोंद झाली. तेव्हापासून तमिळनाडू, मध्य प्रदेश, राजस्थान, केरळ, महाराष्ट्र, उत्तर प्रदेश, दिल्ली आणि कर्नाटक या इतर अनेक राज्यांमध्ये नंतर प्रकरणे नोंदवली गेली. 2024 मध्ये 2 जुलैपर्यंत महाराष्ट्रातील पुणे (6), कोल्हापूर (1) आणि संगमनेर (1) येथे आठ प्रकरणे नोंदली गेली आहेत.

2024-07-03T11:07:39Z dg43tfdfdgfd