VIDHAN PARISHAD ELECTION ANNOUNCED: लोकसभेच्या रणधुमाळीत विधान परिषदेचं बिगुल वाजलं, 4 जागांसाठी निवडणूक जाहीर

Maharashtra Vidhan Parishad Election Announced for Teacher, Graduate Constituency: लोकसभा निवडणुकीच्या रणधुमाळीत विधान परिषद परिषद निवडणुकीचं बिगुल वाजलं आहे. निवडणूक आयोगाने महाराष्ट्र विधानपरिषदेच्या शिक्षक आणि पदवीधर मतदारसंघाच्या चार जागांसाठी निवडणूक जाहीर केली आहे. मुंबई पदवीधर, कोकण विभाग पदवीधर, नाशिक विभाग शिक्षक आणि मुंबई शिक्षक या चार विधानपरिषदेच्या जागांवर ही निवडणूक होणार असून यासाठी सोमवारी 10 जून 2024 रोजी मतदान प्रक्रिया राबवली जाणार आहे.

विधानपरिषदेच्या शिक्षक आणि पदवीधर मतदारसंघाच्या 4 सदस्यांचा कार्यकाळ संपत आहे. निवडणूक जाहीर केली आहे. मुंबई पदवीधर मतदारसंघाचे आमदार विलास विनायक पोतनीस, कोकण पदवीधर मतदारसंघाचे आमदार निरंजन वसंत डावखरे, नाशिक विभाग शिक्षक मतदारसंघाचे आमदार किशोर भिकाजी दराडे आणि मुंबई शिक्षक मतदारसंघाचे आमदार कपिल हरिश्चंद्र पाटील यांचा कार्यकाळ दिनांक 7 जुलै 2024 रोजी संपत आहे. त्यामुळे ते महाराष्ट्र विधानपरिषदेतून निवृत्त होणार आहेत. त्यामुळे रित होत असलेल्या 2 शिक्षक मतदारसंघ आणि 2 पदवीधर मतदारसंघातील जागांसाठी निवडणूक आयोगाने निवडणूक जाहीर केली आहे.

विधान परिषद निवडणुकीचं संपूर्ण वेळापत्रक

निवडणूक आयोगाकडून या निवडणुकीसाठी बुधवारी 15 मे 2024 रोजी अधिसूचना जारी केली जाणार आहे. या निवडणुकीच्या वेळापत्राकानुसार बुधवारी 22 मे 2024 पर्यंत इच्छुक उमेदवारांना अर्ज दाखल करता येणार आहे. त्यानंतर शुक्रवार 24 मे 2024 रोजी उमेदवारांनी दाखल केलेल्या अर्जांची छाननी केली जाईल आणि उमेदवारी अर्ज मागे घेण्याची मुदत सोमवार 27 मे 2024 पर्यंत असेल. त्यानंतर सोमवार दिनांक 10 जून 2024 रोजी सकाळी 8 ते दुपारी 4 या वेळेत या चारही मतदारसंघात मतदान घेण्यात येईल आणि गुरूवार दिनांक 13 जून 2024 रोजी मतमोजणी केली जाईल. ही संपूर्ण प्रक्रिया दिनांक 18 जून 2024 रोजी पूर्ण होईल असे निवडणूक आयोगाने प्रसिद्धीपत्रकातून सांगितले आहे.

लोकसभेच्या निकालानंतर विधान परिषदेसाठी मतदान

देशात सध्या लोकसभा निवडणुकीची धामधूम सुरू आहे. निवडणूक आयोगाने 7 टप्प्यात लोकसभा निवडणूक जाहीर केली असून सुरुवातीच्या 3 टप्प्यातील मतदान पूर्ण झाले आहे. आता चार टप्प्यातील निवडणुका बाकी आहेत. पुढील चार टप्प्यात 13 मे, 20 मे, 25 मे आणि 1 जून रोजी मतदान होणार आहे. त्यानंतर 4 जून रोजी मतमोजणी होणार आहे. ही निवडणूक प्रक्रिया संपताच राज्यात 10 जून रोजी विधानपरिषदेसाठी निवडणूक होणार आहे.

2024-05-08T13:35:03Z dg43tfdfdgfd