TALOJA WATER SHORTAGE ISSUE : भीषण पाणीटंचाईविरोधात तळोजावासीय आक्रमक, 20 जूनला आंदोलनाचा इशारा

Taloja Water Shortage Issue : फेज 1 आणि 2 मध्ये उद्भवलेल्या भीषण पाणीटंचाईविरोधात तळोजावासीय आक्रमक झाले आहेत. दररोजच्या त्रासातून सुटका व्हावी, लोकांना वेळेवर पुरेसे पाणी मिळावे यासाठी येत्या 20 जून रोजी रायगड भवन, CBD बेलापूर येथे संबंधित रहिवाशी जाहीर आंदोलन करणार आहेत. तळोजा फेज 1 आणि 2 सीएचएस फेडरेशनच्या 9 जून रोजी झालेल्या निर्णायक बैठकीत हा निर्णय घेण्यात आला, येथे सुमारे 150 गृहनिर्माण संस्था प्रतिनिधींनी पाणी टंचाई, भ्रष्टाचार आणि पाणी चोरीबद्दल नाराजी व्यक्त केली.

वेळेवर पाणी मिळत नसल्याने रहिवासी हैराण

उन्हाळ्याच्या आधीपासूनच नवी मुंबई, खारघर, तळोजा, कामोठे नोड, या ठिकाणच्या रहिवाशांना पाणी टंचाईचा सामना करावा लागत आहे. पुरेसे पाणी न मिळाल्याने या ठिकाणचे रहिवासी हैराण झाले आहे. आधीच विविध ठिकाणी सातत्याने करण्यात येणाऱ्या देखभाल, दुरुस्तीच्या कामांमुळे सातत्याने या ठिकाणचा पाणीपुरवठा बंद ठेवण्यात येत आहे. ज्या दिवशी हे काम सुरू असते त्या दिवशी पाणीपुरवठा होतच नाही आणि दुसऱ्या दिवशी अतिशय कमी दाबाने पाणीपुरवठा केला जातो. यामुळे या ठिकाणच्या रहिवाशांच्या संतापाचा कडेलोट झाला आहे. काही ठिकाणी टँकरने पाणीपुरवठा केला जातो पण तोही पुरेशा प्रमाणात होत नाही. याचा नाहक त्रास येथील रहिवाशांना सहन करावा लागत आहे.

तळोजा वासियांच्या विविध मागण्या

सिडको अधिकाऱ्यांच्या उद्धट वृत्तीमुळे संतप्त झालेल्या रहिवासी आणि महासंघाच्या सदस्यांनी एकमताने आंदोलन करण्याचा निर्णय घेतला. आंदोलकांची महत्त्वपूर्ण मागणी म्हणजे पाणीपुरवठा, अभियंता राहुल सरोदे यांच्यावर तात्काळ कारवाई करणे, तळोजा फेज 2 मधील पाण्याची टाकी कार्यान्वित करून महागड्या पाण्याच्या टँकरवरील अवलंबित्व कमी करणे यावर विशेष भर देण्यात आला.

सिडकोला देणार पत्र

रविवारच्या घेण्यात आलेल्या बैठकीत पाण्याच्या बिलातील तफावत, पाईपलाईनची अपूर्ण कामे आणि अतिरिक्त व्हॉल्व्ह बसवण्याची गरज यासह विविध गंभीर समस्यांवर चर्चा करण्यात आली. महासंघाचे एक शिष्टमंडळ येत्या दोन दिवसांत सिडको कार्यालयाला भेट देऊन या समस्यांची रूपरेषा देणारे औपचारिक पत्र सादर करतील, असा निर्णय या बैठकीत घेण्यात आला.

पत्राद्वारे पाठिंब्याचे आवाहन

या निषेधाला बळ देण्यासाठी तळोजा येथील विविध सामाजिक संस्था आणि राजकीय पक्षांना पत्राद्वारे पाठिंब्याचे आवाहन करण्याची फेडरेशनची योजना आहे. अध्यक्ष प्रसाद ढगेपाटील यांच्या नेतृत्वाखाली झालेल्या या बैठकीला महासंघाचे सरचिटणीस मोहम्मद ताहीर, खजिनदार प्रबोध कुमार, दीक्षा जाधव, सचिव इलियाज काझी, निसार उलादे, निसार शेख, फिरोज राऊत, गणेश भगत यांच्यासह 150 हून अधिक सोसायटी सदस्य आणि प्रमुख पदाअधिकारी उपस्थित होते.

2024-06-13T02:52:15Z dg43tfdfdgfd