SATARA ELECTION RESULTS 2024: साताऱ्यात गुलाल भाजपचाच, उदयन राजेंनी राखला साताऱ्याच्या गादीचा मान

Satara Election Results 2024: कोणाला तिकीट मिळणार इथपासून सुरू झालेली कांटे की टक्कर ही विजयापर्यंत कायम राहिली. भाजपकडून उदयन राजेंना तिकीट जाहीर झाल्यानंतर राष्ट्रवादी शरदचंद्र पवार गटाकडून शशिकांत शिंदे यांना तिकीट देण्यात आले होते. त्यामुळे दोन्ही उमेदवार तोडीस तोड असल्याने या जागेसाठी चुरशीची लढत पाहायला मिळाली.

सातारा लोकसभा मतदारसंघात भाजपकडून छत्रपती उदयनराजे भोसले यांच्या विरोधात राष्ट्रवादी शरदचंद्र पवार पक्षाचे नेते शशिकांत शिंदे निवडणुकीच्या रिंगणात होते. एक्झिट पोलमध्ये उदयनराजे भोसले यांचा पराभव होईल असा दावा करण्यात आला होता पण तो आज सपशेल चुकीचा ठरला.

दोन्ही उमेदवारांमध्ये कांटे की टक्कर

मतमोजणी सुरु झाल्यापासून दोन्ही उमेदवारांमध्ये कांटे की टक्कर पाहायला मिळत होती. त्यामुळे विजयाचा गुलाल नेमका कुणाचा याकडे सर्वांचे लक्ष लागले होते. उदयनराजे भोसले यांनी आता गेल्या निवडणुकीचा वचपा काढला आहे. त्यांनी शशिकांत शिंदे यांचा पराभव करत विजय मिळवला आहे. अखेर साताऱ्यात उदयनराजे भोसले यांची सरशी झाली आहे.

विजयी होणारच असा विश्वास

सातारा लोकसभेसाठी तिकीट मागत असताना आपण येथून विजयी होणारच असा विश्वास उदयनराजे भोसले यांनी व्यक्त केला होता. पक्षाकडून उमेदवारी मिळावी म्हणून राजेंनी दिल्लीत मुक्कामही ठोकला होता. मावळते खासदार श्रीनिवास पाटील यांनी निवडणूक लढण्यास नकार दिल्याने शरद पवार गटापुढे कोणाला उमेवारी द्यावी म्हणून साशंकता होती. त्यानंतर त्यांनी शशिकांत शिंदे यांना उमेदवारी जाहीर केली होती.

अखेर उदयनराजेंनीच बाजी मारली

कोरेगावचे माजी आमदार शशिकांत शिंदे यांना तिकीट जाहीर झाल्यानंतर कांटे की टक्कर होईल असे कोणालाही वाटले नव्हते. एक्झिट पोलमध्येही उदयनराजे भोसले पराभूत होतील अशीच शक्यता वर्तवण्यात आली होती. पण आता भाजप उमेदवार उदयनराजे भोसले यांचा विजय निश्चित झाला आहे. या अटीतटीच्या लढतीत उदयनराजे भोसले यांनीच अखेर बाजी मारली आहे. साताऱ्याच्या गादीचा मान राखण्यात त्यांना यश मिळाले आहे.

कराड दक्षिण मतदारसंघात उदयनराजे यांना अधिकचे मताधिक्य मिळाले आहे. विद्यमान लोकप्रतिनिधींनी त्याचे आत्मचिंतन करावे असे सांगत सातारा लोकसभेचे भाजपचे प्रभारी डॉ अतुल भोसले यांनी पृथ्वीराज चव्हाण यांच्यावर टीका केली आहे.

मी पूर्णपणे असमाधानी- उदयन राजे

सातारच्या जनतेने ज्या पद्धतीने मला निवडून दिलं त्याबद्दल मी पूर्णपणे असमाधानी आहे. लोक केवळ पैसे घेतात आणि मत देतात. पैसे जर घेणार असतील तर त्याला काय अर्थ आहे. माझं मताधिक्य हे मला मोठ्या प्रमाणावर अपेक्षित होतं. ते अपेक्षित मला मदत किंवा मिळालं नाहीये. मी याबाबतीत सविस्तर एक दोन दिवसात बोलेन असे उदयनराजे निवडून आल्यानंतर पत्रकारांशी बोलताना म्हणाले.

2024-06-04T14:34:27Z dg43tfdfdgfd