NANDURBAR NEWS : ९७ हजार विद्यार्थी गणवेशाच्या प्रतीक्षेत, राज्य शासनाच्या 'एक राज्य एक गणवेश' योजनेचा फज्जा
महेश पाटील, नंदुरबार : राज्य शासनाने मोठा गाजावाजा करत एक राज्य एक गणवेश ही योजना जाहीर केली. पहिली ते आठवीच्या विद्यार्थ्यांसाठी गणवेश पहिल्या दिवशी देण्यात येणार असे जाहीर केले, मात्र शाळा सुरू होऊन १८ दिवस उलटले, तरी नंदुरबार जिल्ह्यातील ९६ हजार ९५२ विद्यार्थी गणवेशाच्या प्रतीक्षेत आहेत. गणवेश शिवण्यासाठी ३ हजार महिलांचे प्रशिक्षण पूर्ण होऊन त्या कापडाची वाट पाहत आहेत. मात्र अद्याप गणवेशासाठी कापड उपलब्ध झाले नाही. राज्यातील बोटावर मोजण्या इतक्या जिल्ह्यातच कापड उपलब्ध करून देण्यात आले आहे. नंदुरबार जिल्ह्यातील विद्यार्थ्यांना १५ ऑगस्टपर्यंत गणवेश मिळेल की नाही याची हमी नाही.
राज्यातील सरकारी, स्थानिक संस्थाच्या शाळांना शासनाने इयत्ता पहिली ते आठवीच्या विद्यार्थ्यांसाठी 'एक राज्य, एक गणवेश' ही योजना अंमलात आणली आहे. जिल्ह्यात १५ जून पासून शाळांना सुरुवात झाली. जून उलटून दोन दिवस झाले, तरी राज्यस्तरावर गणवेशासाठी अद्याप कापड उपलब्ध करून देण्यात आले नाही. त्यामुळे जिल्ह्यातील ९६ हजार ९५२ विद्यार्थी गणवेशाच्या प्रतीक्षेत आहेत. हे विद्यार्थी घरच्या गणवेशातच शाळेत येत आहेत.
जिल्ह्यात पहिली ते आठवीचे एकूण ९६ हजार ९५२ विद्यार्थी आहेत. यात ४८ हजार ६२८ मुले, तर ४८ हजार ३२४ मुली आहेत. नंदुरबार तालुक्यात १५ हजार ८९१, नवापूर १० हजार ५६२, शहादा २५ हजार ६२८, तळोदा १० हजार ८५६, अक्कलकुवा १७ हजार ८७८ आणि धडगाव तालुक्यात १६ हजार १३७ विद्यार्थी आहेत. सदर गणवेश शिवणाचे काम महिला आर्थिक विकास महामंडळाला देण्यात आले आहे.
माविमतर्फे ३ हजार महिलांना प्रशिक्षण
राज्य शासनाने राज्यातील विद्यार्थ्यांसाठी गणवेश शिवणाचे काम महिला आर्थिक विकास महामंडळाला देण्यात आले आहे. बचत गटातील सुमारे ३ हजार महिलांकडून गणवेश शिवून घेणार आहे. त्या पार्श्वभूमीवर महिलांना प्रशिक्षणही देण्यात आले आहे. मात्र अद्याप कापड व त्यामुळे कामच उपलब्ध नाही. या बचत गटातील अनेक महिला शेतकरी कुटुंबातील असल्याने पावसाळा सुरू झाल्याने खरीप हंगामातील कामे सुरू झाली आहेत. त्या पार्श्वभूमीवर वेळेवर गणवेश शिवून देण्यासाठी महिलांना मोठी कसरत करावी लागणार आहे. कापड उपलब्ध होताच, ३ हजार महिलांकडून गणवेश तयार करून घेण्यात येतील. एक ते दीड महिन्यात काम पूर्ण होईल. महिलांना गणवेशनिहाय मानधन दिले जाणार आहे. यासाठी माविमंने पूर्ण तयारी केली आहे अशी माहिती आहे.विना गणवेशात विद्यार्थी साजरा करणार स्वातंत्र्य दिन
गणवेशासाठी राज्य शासनाकडून कापड आल्यावर माविमं बचत गटातील सुमारे ३ हजार महिलांकडून गणवेश शिवून घेणार आहे. यासाठी एक ते दीड महिन्याचा कालावधी लागणार आहे. तीन जुलै पर्यंत कापड उपलब्ध झाले नाही. स्वातंत्र्य दिनाला दीड महिन्यापेक्षा कमी कालावधी उरला आहे. राज्यात बोटावर मोजण्या इतक्या जिल्ह्यातच कापड उपलब्ध झालेला आहे. त्यामुळे नंदुरबार जिल्ह्याला गणवेशासाठी कापड कधी उपलब्ध होईल याबाबत सांगता येत नाही. त्यामुळे विद्यार्थ्यांना विना गणवेशानेच स्वातंत्र्य दिन साजरा करावा लागेल, की काय अशी शंका उपस्थित होत आहे. कापड उपलब्ध होताच ३ हजार महिलांकडून गणवेश तयार करून घेण्यात येतील. एक ते दीड महिन्यात काम पूर्ण होईल. महिलांना गणवेशनिहाय मानधन दिले जाणार आहे. यासाठी माविमंने पूर्ण तयारी केली आहे.अशी माहिती डिसीओ माविम कांता बनकर यांनी दिली.जिल्ह्यातील ९६ हजार ९५२ विद्यार्थ्यांना गणवेश वाटप करण्यात येणार आहे. यासाठी राज्य शासनाकडून अद्याप कापड आले नाही. गणवेशासाठी लागणारे कापड आमच्याकडे न येता परस्पर माविमकडे जाणार असल्याची माहिती प्राथमिक शिक्षणाधिकारी वंदना वळवी यांनी दिली. शासनाच्या हलगर्जीपणामुळे विद्यार्थ्यांना अद्याप गणवेश मिळाले नाही. गणवेश दिवाळीला मिळतील का असा सवाल पालकांतर्फे करण्यात येत आहे.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-07-03T13:37:45Z dg43tfdfdgfd