CHHATRAPATI SAMBHAJINAGAR: रस्त्याची कामे सायंकाळीच, पारा चाळीशीपार पोहोचल्याने दुपारी काम बंदचा निर्णय

म. टा. प्रतिनिधी, छत्रपती संभाजीनगर : वाढत्या उन्हाचा फटका शहरातील रस्त्यांच्या कामांनादेखील बसला आहे. महापालिकेच्या प्रशासनाने रस्त्यांच्या काँक्रिटीकरणाची कामे उन्हाचा पारा कमी होईपर्यंत थांबवली आहेत, तर ‘स्मार्ट सिटी’ च्या यंत्रणेने उन्ह कमी झाल्यावर सूर्यास्तानंतर कामे करण्याचा निर्णय घेतला आहे.

गेल्या काही दिवसांपासून शहराचे तापमान चाळीशीपार जात आहे. ४० ते ४२ अंश सेल्सियसवर तापमान गेल्यामुळे नागरिक हैराण झाले आहेत. दुपारी बारा ते सायंकाळी चार वाजेपर्यंत रस्त्यांवरील वाहतूकदेखील रोडावल्याचे चित्र असते. शहरातील रस्त्यांच्या कामांची गरज लक्षात घेऊन महापालिकेने स्वत:च्या निधीतून शंभर कोटी रुपयांची तरतूद करून ६१ रस्त्यांची कामे करण्याचा निर्णय घेतला. ही सर्व कामे व्हाइट टॉपिंगच्या माध्यमातून केली जाणार आहेत. या कामांसाठी चार कंत्राटदार नियुक्त करण्यात आले असून प्रत्येक कंत्राटदाराला कामांचे वाटप करून देण्यात आले आहे.

रस्त्यांची कामे सुरू करण्यापूर्वी ड्रेनेज लाइन, जलवाहिनीची कामे करुन घेण्याच्या सूचना पालिका प्रशासनाने संबंधित कंत्राटदारांना केल्या होत्या, त्यामुळे ही कामे करुन घेऊन रस्त्यांची कामे सुरू करण्यास विलंब लागल्याचे सांगण्यात येत आहे. दोन ते तीन महिन्यांपूर्वी रस्त्यांची कामे सुरू करण्यात आली. आता वाढत्या उन्हामुळे ती थांबवण्यात आली आहेत. पारा चाळीस अंशाच्या वर सरकला तर काँक्रिटीकरणाचे काम योग्य प्रकारे होत नाही. त्यामुळे पारा उतरल्यावर रस्त्याचे काम करण्याच्या मार्गदर्शक सूचना सरकारच्या वतीने दिल्या आहेत. या मार्गदर्शक सूचनेनुसार कामे थांबवण्याचा निर्णय घेण्यात आला, अशी माहिती सूत्रांनी दिली.

‘स्मार्ट सिटी’च्या माध्यमातूनदेखील शहरात रस्त्यांच्या काँक्रिटीकरणाची कामे केली जात आहेत. महापालिकेने कामे थांबवल्यामुळे ‘स्मार्ट सिटी’ने काय भूमिका घेतली आहे, याची माहिती घेण्यासाठी ‘स्मार्ट सिटी’चे प्रकल्प व्यवस्थापक इम्रान खान यांच्याशी संपर्क साधला असता खान म्हणाले, ‘रस्त्यांची कामे आम्ही सुरू ठेवली आहेत. उन्ह कमी झाल्यावर सूर्यास्तानंतर ही कामे केली जात आहेत. कामाचा दर्जा चांगला असावा यासाठी आमचा आग्रह आहे. १११ पैकी ८२ रस्त्यांची कामे सुरू असून ४२ रस्त्यांची कामे पूर्ण झाली आहेत अशी माहिती त्यांनी दिली.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-08T09:41:42Z dg43tfdfdgfd