वडील पहिल्यापासून लाल दिव्यात, लेकीनेही ठरवलं, पाठ मोडेपर्यंत अभ्यास केला, UPSC परीक्षेतून लेक कलेक्टर

शुभम बोडके, नाशिक : नाशिक परिक्षेत्राचे विशेष पोलीस महानिरीक्षक डॉक्टर बाळासाहेब शेखर पाटील आणि सौ. विद्युलता शेखर पाटील यांच्या लेकीने यूपीएससी परीक्षेत मोठं यश मिळवलं आहे. शालेय जिवनात पाहिलेलं ध्येय नजरेसमोर ठेवून अहोरात्र अभ्यास आणि कष्ट करत, सोशल मीडियापासून दूर राहून आज घवघवीत यश संपादन केलं आहे. नाशिक येथील जिल्हाधिकारी बंगल्या जवळील कोतवाल पार्क येथे राहत असताना, नाशिकचं जिल्हाधिकारी कार्यालयाचं निसर्गरम्य निवासस्थान पाहून मी देखील एक दिवस जिल्हाधिकारी होणारच हे स्वप्न पाहिलेल्या जान्हवी शेखर पाटील यांनी अखेर कलेक्टर होण्याचे स्वप्न पूर्ण केलं आहे.

जान्हवी शेखर पाटील - नवले पाटील, यांचं शिक्षण फ्रावशी ॲकॅडमी येथून झाले आहे. बारावीपर्यत शिक्षण नाशिक येथे झाले. पुण्यातील एमआयटीत सिव्हिल शाखेतून अभियांत्रिकीचे शिक्षण घेतले. यानंतर त्यांनी सन २०१६ मध्ये केंद्रीय लोकसेवा आयोगाच्या परिक्षांच्या तयारीला सुरुवात केली. सुरुवातील दिल्लीत शिकवणी लावून अभ्यास केला. नंतर पुण्यात घरी राहून त्यांनी स्वयंअध्ययन सुरु ठेवले. २०२० मध्ये यूपीएससी परीक्षेमध्ये त्यांनी चांगले यश मिळविले. त्यांची Danic कलेक्टर म्हणून निवड झाली असून त्या दिल्ली येथे सध्या कार्यरत आहेत.

नोकरी करता करता त्यांनी पुन्हा यूपीएससीची परीक्षा दिली. त्या देशात १४५ व्या क्रमांकाने उत्तीर्ण झाल्या आहेत. जान्हवी सुमेश नवले-पाटील यांनी २०२३ मध्ये घेण्यात आलेल्या केंद्रीय लोकसेवा आयोगाच्या नागरी सेवा परीक्षेत दुसर्‍यांदा यश मिळविले आहे. त्यांचा देशात ओपन कॅटेगरीमध्ये १४५वा क्रमांक आला आहे.

अकरावी-बारावीचे शिक्षण नाशिकच्या एच.पी.टी. सायन्स कॉलेजमध्ये केलं. त्यानंतर पुण्याच्या एमआयटी कॉलेजमधून सिव्हील इंजिनिअरिंगमधील पदवी प्राप्त करताना त्यांनी प्रथम क्रमांक मिळवला होता. २०२० पासून जिल्हाधिकारी होण्याचे उद्दिष्ट नजरेसमोर ठेवत १४५ वा रँक मिळवत आपले कतृत्व सिद्ध केले.

नाशिक जिल्ह्यात विशेषत: पोलीस खात्याची उज्वल परंपरा आणि प्रतिमा उंचावण्यात डॉक्टर बी.जी. शेखर यांचे कार्य अवघ्या जिल्ह्याला नव्हे, तर महाराष्ट्रात परिचित आहे. ते आपल्या प्रदीर्घ सेवेतून लवकरच सेवानिवृत्त होणार आहेत. डॉक्टर बी.जी शेखर आणि त्यांच्या पत्नी डॉ. विदयुलता शेखर हे अनेक पदव्यांचे मानकरी आहेत. त्यांचे चिरंजीव आदित्य हे देखील एम.टेक असून ते पी एच डीचं अध्ययन करीत आहेत.

जान्हवी या माजी खासदार विदुरा उर्फ नानासाहेब नवले यांच्या नातसून असून त्यांचे पती सुमेश नवले हे नोविगो या आंतरराष्ट्रीय अमेरिकन आयटी कंपनीमध्ये सिनियर मॅनेजर आहेत. स्पर्धा परिक्षेचा अभ्यास करताना जान्हवी यांना घरातूनच आई डॉ. विद्युलता (B.E. Elect. PhD) आणि डॉ. बाळासाहेब शेखर पाटील (IPS) यांचे अनमोल मार्गदर्शन लाभले. राज्याचे सहकार मंत्री दिलीप वळसे पाटील, पुणे जिल्हा परिषद सदस्या तुलसी सचिन भोर, सरपंच अर्चना बारवे, उपसरपंच कविता चासकर, भीमाशंकर साखर कारखान्याचे संचालक बाजीराव बारवे, नानासाहेब बारवे, श्रीकांत शेगर, बन्सी शेगर यांच्यासह ग्रामस्थांनी जान्हवीचे कौतुक केले आहे.

निफाडचे पोलीस उपाधीक्षक म्हणून डॉक्टर बी.जी. शेखर यांनी दरोडेखोरांविरुद्ध धडाकेबाज कारवाई केली, त्यावेळेस निफाड येथे इंग्लिश मीडियमची सोय नव्हती. निफाड येथून काळा-पिवळ्या टॅक्सीने कुमारी जानव्हीने २० किलोमीटरचा प्रवास लासलगावपर्यंत दररोज करून कलगीधर इंग्लिश मीडियम मध्ये के.जी आणि सिनियर के.जीचे शिक्षण घेतले. एवढ्या मोठ्या पोलीस अधिकाऱ्याची मुलगी साध्या काळया-पिवळ्या टॅक्सीने शिक्षणासाठी लासलगाव येत होती. परंतु कोणतीही ओळख आणि घरी गाडी असताना प्रवासी वाहतूकीचा आधार घेत शिक्षणाचा श्री गणेशा तिने लासलगाव येथे केला. त्यानंतर निफाड येथील शैक्षणिक सोयी अभावी डॉक्टर बी.जी शेखर पाटील यांचं कुटुंब नाशिक येथे मुलीच्या शिक्षणासाठी स्थलांतरित झालं आणि जान्हवी आणि मुलगा आदित्य हे सुरुवातीला सेंट फ्रान्सिस इंग्लिश मीडियम आणि नंतर फ्रावशी अकॅडमी या ठिकाणी शिक्षण घेतले.

"यूपीएससी परीक्षेच्या तयारीचा प्रवास खूप आवाहनात्मक असतो. या प्रवासात मानसिकदृष्ट्या आणि शारीरिकदृष्ट्या कणखर राहणे गरजेचे असते. अभियांत्रिकीचे शिक्षण घेतले आहे. परंतु नागरी सेवा परीक्षा द्यायची हे सुरुवातीपासूनच मनाशी पक्के केले होते. वडील आयपीएस असल्याने त्यांच्याकडून प्रेरणा मिळाली. अभ्यासात सातत्य राखल्याने दुसऱ्यांदा यश मिळविता आले,'' असे जान्हवी सुमेश नवले पाटील यांनी सांगितले.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-23T16:14:48Z dg43tfdfdgfd