MUMBAI CRIME NEWS: NCB कडून ड्रग्ज रॅकेटचा पर्दाफाश; 1 कोटीचे अंमली पदार्थ जप्त

Drug Syndicate Busts im Mumbai: मुंबईत नार्कोटिक्स कंट्रोल ब्युरोने (NCB) ड्रग्ज रॅकेटचा पर्दाफाश केला आहे. NCB च्या झोनल युनिटने ही कारवाई करत 1 कोटी किमतीचे सायकोट्रॉपिक पदार्थ (अंमली पदार्थ) जप्त केले आहेत. तसेच या कारवाईल एका व्यक्तीला अटक करण्यात आली आहे. या प्रकरणी गुन्हा दाखल करण्यात आला असून पुढील कारवाई सुरु आहे.

NCB ने शनिवारी ही कारवाई केली. सायकोट्रॉपिक पदार्थांमध्ये बेकायदेशीर असलेल्या फार्मास्युटिकल औषधांचा समावेश आहे. यात 169.7 किलोग्राम कोडीन सिरप, अल्प्राझोलमच्या 22,000 गोळ्यांचा समावेश आहे. हे पदार्श परराज्यातून मुंबई आणि उपनगरात विक्रीसाठी आणण्यात आले होते अशी माहिती समोर आली आहे. पनवेल, रायगड, मुंब्रा आणि ठाणे येथून हे पदार्थ जप्त केले आहेत. तसेच आणखी काही ठिकाणी हे पदार्थ असण्याचीही शंका NCB च्या अधिकाऱ्यांना आहे, त्यामुळे या प्रकरणी अटक करण्यात आलेल्या आरोपीची चौकशी सुरु आहे. या चौकशीतून महत्वाची माहिती समोर येण्याची शक्यता आहे.

सर्वात आधी पनवेलमधील एका ठिकाणाहून 169.7 किलो कोडीन सिरपच्या बाटल्या आणि 12,400 अल्प्राझोलम गोळ्या जप्त केल्या. या कारवाईच वाहनासह एका आरोपीला अटक करण्यात आली. त्यानंतर, आरोपीने दिलेल्या माहितीच्या आधारे मुंब्रा येथील एका घराची झडती घेण्यात आली ज्यात अल्प्राझोलम आणि नायट्राझेपमचा आणखी एक साठा जप्त करण्यात आला.

NCB ने पाळत ठेऊन ही कारवाई केली. शरीफ नावाचा व्यक्ती माल घेण्यासाठी आला होता तेव्हा NCB च्या अधिकाऱ्यांनी त्याला अडवले. त्यानंतर स्टोरेज परिसराची पाहणी केल्यावर, एनसीबीच्या पथकाने कोडीन सिरप आणि अल्प्राझोलम गोळ्या जप्त केल्या. तसेच शरीफची चौकशी केल्यानंतर आणखी काही ठिकाणावरुन अंमली पदार्थ जप्त करण्यात आले असल्याची माहिती समोर आली आहे. आता या प्रकरणात आणखी किती लोकांचा सहभाग आहे आणि परराज्यात हे जाळे कसे पसरलेले आहे याचा शोध घेतला जात आहे.

याप्रकरणी माहिती देताना NCB चे अतिरिक्त संचालक, अमित घावटे यांनी म्हटले की, 'लोकसभा निवडणुकांमुळे सुरक्षा वाढवण्यात आली आहे. NCB ला राज्यात आणलेल्या बेकायदेशीर फार्मास्युटिकल औषधांची माहिती मिळाली होती. याची सविस्तर माहिती घेत कारवाई करण्यात आली आहे. तसेच NCB ने इतर राज्यांमधून मोठ्या प्रमाणात अवैध फार्मास्युटिकल औषधे राज्यात आणणाऱ्या अनेक संशयितांची ओळख पटवली आहे, त्यांची चौकशी केली जाईल.'

2024-05-06T06:02:27Z dg43tfdfdgfd