JALGAON VIDHAN SABHA: भाजपमध्ये इच्छुकांची भाऊगर्दी; जळगाव जिल्ह्यातून नावे बंद लिफाफ्यात वरिष्ठांकडे

म. टा. प्रतिनिधी, जळगाव : आगामी विधानसभा निवडणुकांसाठी जळगाव जिल्ह्यात असलेल्या संभाव्य पाच मतदारसंघातील इच्छुकांची नावे भाजपच्या पदाधिकाऱ्यांकडून बंद लिफाफ्यात घेण्यात आली. ही नावे त्या-त्या विधानसभा मतदारसंघातील निरीक्षकाकडे मंगळवारी सोपविण्यात आली. जळगाव शहर व रावेर मतदारसंघासाठी सर्वाधिक इच्छुक, तर जामनेर मतदारसंघासाठी एकच नाव असल्याची माहिती मिळाली आहे.

जळगाव जिल्ह्यातील जळगाव शहर, चाळीसगाव, रावेर, भुसावळ व जामनेर या पाच विधानसभा मतदारसंघासाठी सोमवारी भाजपचे निरीक्षक जिल्ह्यात दाखल झाले होते. जळगाव शहरासाठी माजी खासदार डॉ. हिना गावित, चाळीसगावमध्ये अनुप अग्रवाल, रावेरसाठी जयकुमार रावल, भुसावळसाठी राहुल आहेर, तर जामनेर विधानसभा मतदारसंघासाठी शिवाजीराव कर्डिले हे निरीक्षक म्हणून आले होते.

प्रमुख पदाधिकाऱ्यांशी चर्चाया पाचही निरीक्षकांनी त्या-त्या मतदारसंघात जावून तेथील प्रमुख पदाधिकारी, त्या मतदारसंघातील नेते यांच्याशी चर्चा केली. यापू्र्वीच मतदारसंघातून निवडणूक लढविण्याची इच्छा असलेल्या भाजपच्या पदाधिकाऱ्यांकडून अर्ज मागविण्यात आले होते. त्यानुसार निवडणूक लढवू इच्छिणाऱ्या या संभाव्य मतदारसंघातील इच्छुकांनी आपले अर्ज दिले होते. मंगळवारी पक्षाच्या प्रमुख पदाधिकाऱ्यांनी ही नावे एका बंद लिफाफ्यात निरीक्षकांकडे सोपविली आहे.

उमेदवारांची निवड श्रेष्ठींकडूनच

निरीक्षक आता ही नावे भाजपमधील राज्याच्या श्रेष्ठींकडे देणार आहेत. त्यावर भाजपच्या कोअर कमेटीत निर्णय होऊन इच्छुकांमधून उमेदवारांची घोषणा केली जाणार असल्याची माहिती भाजपच्या पदाधिकाऱ्यांनी दिली आहे. यात जळगाव शहर व रावेर मतदारसंघात सर्वाधिक इच्छुक आहेत. तसेच इतर मतदारसंघातही विद्यमान आमदारांसह अन्य एक ते दोन जणांनी नावे दिली आहेत. मात्र, जामनेर मतदारसंघातून एकमेव गिरीश महाजन यांचेच नाव इच्छुकांच्या यादीत असल्याचे समजते.

मतदारसंघनिहाय इच्छुकांची संख्या

- जळगाव शहर : विद्यमान आमदार सुरेश भोळे, डॉ. अश्विन सोनवणे, रोहित निकम यांच्यासह सहा जण

- रावेर : अमोल जावळे, डॉ. केतकी पाटील यांच्यासह चार जण

- भुसावळ : विद्यमान आमदार संजय सावकारे यांच्यासह दोन जण

- चाळीसगाव : आमदार मंगेश चव्हाण यांच्यासह दोन जण

- जामनेर : विद्यमान आमदार गिरीश महाजन यांचे एकमेव नाव

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-10-02T06:05:45Z dg43tfdfdgfd