SSC-HSC EXAMS 2025: 10वी, 12वी परीक्षा केंद्रांवर ड्रोन कॅमेऱ्यांची नजर अन् व्हिडिओ चित्रीकरण होणार
Surveillance of examination centers through Drone cameras: महाराष्ट्रातील बोर्डाच्या दहावी आणि बारावीच्या परीक्षा कॉपीमुक्त होण्यासाठी आता प्रशासनाने महत्त्वाचा निर्णय घेतला आहे. परीक्षांच्या पार्श्वभूमीवर कॉपी प्रकरणास पूर्णतः प्रतिबंध करण्यासाठी राज्यभर कॉपीमुक्त अभियान यशस्वी करण्यासाठी ड्रोन कॅमेरा, भरारी पथक, व्हिडिओ चित्रीकरण असे विविध मार्ग अवलंबण्यात येणार आहेत.
महाराष्ट्र राज्य माध्यमिक व उच्च माध्यमिक शिक्षण मंडळामार्फत फेब्रुवारी-मार्च 2025 ची उच्च माध्यमिक प्रमाणपत्र (इयत्ता 12वी) परीक्षा 11 फेब्रुवारी ते 18 मार्च 2025 आणि माध्यमिक शालांत प्रमाणपत्र (इयत्ता 10वी) परीक्षा 21 फेब्रुवारी ते 17 मार्च 2025 या कालावधीत होणार आहे. शिक्षणमंत्री दादाजी भुसे यांनी बारावी आणि दहावीच्या परीक्षा कॉपीमुक्त, भयमुक्त आणि निकोप वातावरणामध्ये सुरळीत पार पडाव्यात यासाठी शालेय शिक्षण विभाग आणि महाराष्ट्र राज्य माध्यमिक व उच्च माध्यमिक मंडळाने प्रयत्न करण्याचे निर्देश दिले होते. या पार्श्वभूमीवर मुख्य सचिव सुजाता सौनिक यांनी यासंदर्भात आढावा घेतला.
हे पण वाचा : राज्यातील किती विद्यार्थी शैक्षणिक कामासाठी स्मार्टफोन अन् कम्प्युटर वापरतात? काय सांगतो अहवाल? वाचा
ड्रोन कॅमेराद्वारे परीक्षा केंद्रावर नजर
मुख्य सचिव सुजाता सौनिक यांनी दिलेल्या निर्देशानुसार शिक्षण मंडळामार्फत राज्यातील संवेदनशील परीक्षा केंद्र परिसरामध्ये जिल्हा प्रशासनामार्फत ड्रोन कॅमेराद्वारे परीक्षा केंद्राची निगराणी करण्यात येईल. परीक्षा सुरू होण्याच्या एक दिवस आधी परीक्षा केंद्रावर आवश्यक भौतिक सुविधा सुव्यवस्थित आहेत का ? याची जिल्हा प्रशासनाकडून खात्री केली जाईल.
हे पण वाचा : Atal Tinkering Lab: अटल टिंकरिंग प्रयोगशाळा नेमकी काय? 50,000 सरकारी शाळांमध्ये होणार स्थापना
व्हिडिओ चित्रीकरण आणि भरारी पथके
परीक्षा केंद्राच्या बाहेर जिल्हा प्रशासनामार्फत व्हिडिओ चित्रीकरण करण्यात येईल. जिल्ह्यातील सर्व विभागांचे शासकीय अधिकारी आणि कर्मचाऱ्यांच्या साहाय्याने कॉपीमुक्त परीक्षा होण्यासाठी सर्व परीक्षा केंद्रांवर भरारी पथके आणि बैठी पथके उपलब्ध होतील याचे नियोजन करण्यात येणार आहे.
हे पण वाचा : Bank of Maharashtra Recruitment: बँक ऑफ महाराष्ट्रमध्ये नोकरीची सुवर्णसंधी, परीक्षा न देता थेट मिळणार नोकरी
फेशियल रेकग्निशनने तपासणी
जिल्हा प्रशासनाकडून परीक्षा केंद्रावर नियुक्त केलेल्या केंद्र संचालक, पर्यवेक्षक आणि परीक्षेशी संबंधीत घटकांची फेशियल रेकग्निशन सिस्टीमद्वारे तपासणी करण्यात येईल. तसेच विभागीय मंडळामार्फत परीक्षेशी संबंधित सर्व घटकांना अधिकृत ओळखपत्र देण्यात येईल. महाराष्ट्र प्रिव्हेंशन ऑफ मालप्रॅक्टीसेस ॲक्ट 1982 या कायद्याची अंमलबजावणी करुन तसेच कोणत्याही परीक्षा केंद्रावर गैरप्रकार घडल्यास गैरप्रकारांना उद्युक्त करणारे, मदत करणारे व प्रत्यक्ष गैरमार्ग करणाऱ्यांवर दखलपात्र व अजामीनपात्र गुन्हा दाखल करण्यात येईल. परीक्षा केंद्रापासून 500 मीटर परिसरात झेरॉक्स सेंटर परीक्षा कालावधीत बंद ठेवण्यात येतील तसेच संबंधित परीक्षा केंद्राच्या परिसरात 144 कलम लागू करण्यात येईल.
2025-02-05T05:25:19Z