PHALTAN TRANSFORMER THEFT | फलटण तालुक्यात ट्रान्स्फॉर्मर चोरीचे सत्र सुरूच

साखरवाडी : फलटण तालुक्यातील ग्रामीण भागात ट्रान्स्फॉर्मर चोरीच्या घटनांमध्ये दिवसेंदिवस वाढ होत असून स्थानिक शेतकर्‍यांमध्ये संतापाची लाट उसळली आहे. नुकतीच भिलकटी (ता. फलटण) गावातील निरा-उजवा कालव्यालगत असलेल्या गणेश डीपी नामक शंभर केव्ही क्षमतेच्या ट्रान्स्फॉर्मर चोरट्याने चोरून नेल्याची घटना घडली आहे. या घटनांमुळे प्रशासनाच्या हलगर्जीपणामुळे चोरट्यांचे फावतेय की काय? असा सवाल उपस्थित होत आहे.

भिलकटी गावातील नीरा-उजवा कालव्यालगत असणार्‍या गणेश डीपी हा ट्रान्स्फॉर्मर खाली पाडून त्यामधील तेल (ऑईल) सांडून दिले व तांब्याच्या तारा चोरट्यांनी चोरून नेल्या आहेत. यापूर्वीही मागील काही महिन्यांपासून फलटण तालुक्यातील शेतवस्ती, कालव्यालगतच्या शेकडो ट्रान्स्फॉर्मरची चोरी झाल्याच्या घटना वारंवार घडत आहेत. तरीही संबंधित प्रशासन आणि पोलीस विभाग यांच्याकडून ठोस कारवाई होत नसल्याचा आरोप शेतकरी व स्थानिक नागरिकांमधून होत आहे. या ट्रान्स्फॉर्मर चोरीमुळे शेतकर्‍यांच्या शेतीच्या पंपाचा वीज पुरवठा खंडित झाला आहे.

परिणामी, शेतीच्या कामावर प्रतिकूल परिणाम होत असून, जनावरांच्या पिण्याच्या पाण्याची सुद्धा शेतकर्‍यांसमोर मोठी अडचण होत आहे. दरम्यान, ट्रान्स्फॉर्मरची सुरक्षा व्यवस्था बळकट करावी, डीपीजवळ सीसीटीव्ही बसवावेत. तसेच या प्रकारांना आळा घालण्यासाठी पोलीस विभागाने विशेष मोहीम राबवावी, अशी मागणी स्थानिक नागरिकांनी आणि शेतकर्‍यांनी केली आहे.

2025-07-06T00:37:59Z